كل ماتطلبونة فى الصلاة مؤمنين تنالونة

ابويا لن ينسانى
" كل ماتطلبونة فى الصلاة مؤمنين تنالونة"
الاسم:- ت .ج اسيوط

كنت طالبة فى كلية عملى وهى فى السنة الثالثة كنت طالعة بمادتين من السنين السابقة
وكان المواد الاساسية لسنة ثالثة فى الترم الاول 8 مواد
يعنى كنت بذاكر 10 مواد كنت بذاكر بجدية وبشفاعة البابا كيرلس والانبا كاراس
واما جت امتحانات الترم جيت كان عندى امتحان يوم االاثنين بتاع ثالثة من 1 لحد 4 وكان يوم الاربعاء
عندى امتحانين يعنى قدامى يوم نص قبل يوم الاربعاء وكان يوم الاربعاء عندى امتحانين واحد من 9 لحد 12 بتاع مادة
كنت شايلها من اولى وامتحان بتاع ثالثة من 1 لحد 4 طب

يابابا كيرلس هذاكر امتى دا يوم ونص هلحق اخلص ايه ولا ايه !!

وسهرت اليوم ونص متواصل بذاكر من دى لدى وكان مادة ثالثة دى الدكتورة مش بتحب المسيحين
وانا كنت سايبة تلت اربع امتحان اعمال السنة مش حاله
وروحت للامتحان جيت اول امتحان الصبح وحليت وطلعت على 12 وكنت مبسوطة لانوا كان كويس
بس كنت خايفة لان الدكتور كان مش بيحب بردوا المسيحين ومستعندنى
وطلعت من اللجنة قولت ارجع شوية لحد الامتحان التانى ودخلت الامتحان التانى وفؤجت الامتحان من 7 ورقات
كل سؤال عبارة عن 50 فقرة صح وغلط و اختار وهكذا .......

فطبعا صدمت من شكل الامتحان فحليت اى حاجة وخلصت على الساعة 2 وروحت حطيت راسى فى اللجنة ومدريتش
غير بالمراقب بيصحينى علشان يستلم الورقة وطلعت قولت اشوف ايه ظروف الامتحان فؤجئت من حل اصحابى
بان حلى كلوا غلط وكانت مادة الصبح بتاعت البابا كيرلس ومادة اللى بعديها كانت بتاعت انبا كاراس

وكنت اول مرة اتشفع بيه فلما روحت قولتلهم دى موادكم وزى ماتجيبوها هتكون وعارفة انكم مش هتزعلونى

المهم خلاص قعدت اذكر للامتحانات بعد كدا المهم فى نفس الترم جيت بعد كدا كان عندى 3 امتحانات ورا بعض
مادة من ثالثة يوم الاثنين من 1 لحد 4 ومادة يوم الثلاثاء من ثاتية من 9 لحد 12 ومادة يوم الاربعاء من ثالثة من 1 لحد 4 طب

الدنيا زانقة وهعمل ايه طبعا ركزت على مواد ثالثة وجيت فى ماادة ثانية رغم انى ذاكرتها لكن فى الامتحان معرفتش احط خط
وسيبت الورقة فاضية والمراقب قالى اكتب اى حاجة حتى الاسئلة قولتلوا سيبها على ربنا

وروحت كتبت اسم البابا كيرلس والشهيد العظيم ابى سيفين على الورقة ورشمت عليها الصليب وسيبت اللجنة ومشيت
المهم خلصت امتحانات وكنت عمالة اصلى واقول يابابا كيرلس ياللى عمرك ماسيبتنى ومعجزاتك دايما معايا
متتركنيش انت عارف السنة اد ايه كانت زحمة وعارف انى تعبت اه مش كتير بس كمل انت وطلعنى صافى
نفسى اطلع صافى مش مهم تقديرات بس صافى

المهم دخل الترم الثانى وكانت النتيجة لسا مظهرتش وكنت فى البيت قاعدة بذاكر وسمعت تليفون من واحدة فى الشارع
بتقول لنفسها انا نجحت وصافى فرحت قولت في بالى
يااه يابابا كيرلس لو يجيلى تليفون دلوقت ويقولى انى نجحت صافى نفسى ....

وصدقونى مكملتش الكلمة ولقيت تليفون البيت رن وواحدة صحبتى بتقولى ان النتيجة ظهرت وانى طلعت صافى
بقولها طب انا كنت شايلة مادتين على اساس انهم بيتكبوا فى اخر الكشف ممكن مش يتشافوا عملت ايه فيهم
قالتلى معرفش بس عرفت انك صافى

المهم قعدت اشكرربنا وقولت كمل جميلك ياابويا واكون صافى كلوا وروحت طرت ونزلت الكلية وقلبى عمال يصلى
لحبايبى البابا كيرلس والانبا كاراس ووصلت للنتيجة ويالها من مفأجاه
نجحت صافى حتى فى المادتين نجحت ومش صافى وبس لا تقديرات 5 جيد جدا و2 جيد و1 مقبول

دى تقديرات ثالثة والمادتين كانوا مقبول وكنت فى قمة سعادتى فى الكلية
لدرجة انى بكيت .
انت حنين اوى ياابويا عمرك ماسبتنى حتى فى اصغر تفاصيل حياتى

وحقا كل ماتطلبونة فى الصلاة مؤمنين تنالونة .